Andre dag i Amsterdam starta på eit fransk bakeri som var heilt etter min (vår) smak, fordelt over 3 små plan, bakeri i underetg, disk i 1. etg. og bord i 2. etg. Duftene, betjeninga og maten gjorde ikkje inntrykket dårlegare akkurat. Min draum er no at eit slikt bakeri skal dukke opp her i byen.
Sjekk den frukosten! Alt til den nette sum av 70 kroner
Vi kjøpte oss trikkekort for 3 døgn
(noko som viste seg å vere vel anvendte pengar når føtene fekk nok)
Og her startar moroa. Eg er som kjent glad i å ta bilder av detaljar som andre kanskje ikkje legg merke til. Det kjem til å kome fleire slike detaljbilder heretter.
Du kan tru eg kosa meg med kameraet mitt!
Kven kan tolke denne utsmykkinga for meg?
Flotte gater å rusle i ein søndag i Mai
Fiffig motiv: Ein katt som slikkar nektar av ein bukett peonar
Vi stilte oss i kø til Anne Franks hus. Vi stod i kø i 45 min, og køa bak oss berre vaks og vaks. Det var heilt tydeleg at dette var noko fleire turistar ville få med seg – og det skjønar eg! Vi fekk ikkje ta bilder inne i museet, men kort fortalt er det huset Anne Frank og familien bodde i då ho skreiv den kjende dagboka si. Det var veldig sterkt å gå der og sjå, lese om og høyre om korleis dei hadde det medan dei var der, og om korleis liva deira så tragisk enda. Å vite at akkurat der vi stod hadde ein liten familie gøymt seg frå det dei frykta mest, å bli splitta frå kvarandre og uvissa som fylgde med, var ubeskriveleg. Om du nokon gong er i Amsterdam syns eg du skal ta turen innom.
Etter runden tok vi oss eit lite mellommåltid på cafèen som høyrde til museet
Sykkel og hest og kjerre… typisk for Amsterdam?
Huset til Frank-Familien sett frå andre sida av kanalen
Sjarmerande kanalar var det overalt…
…men ikkje alle tok like godt vare på båtane sine
Vi åt middag på ein liten italiensk restaurant, og tru det eller ei – på 4 av 7 bord sat det nordmenn! Det var heilt klart ein tydeleg ein populær restaurant, sjå berre på veggen
Etter middag var målet å ta turen innom Van Gogh-museet. Vi brukte ganske lang tid på å gå, for vi måtte innom fleire små, søte butikkar, og ikkje minst ta bilde av alt vi såg vi måtte dele med dei heime.
Tagging eller modern art?
Stilige fasadar
Hei der oppe!
På veg til museet skjønte vi at det var noko stort som skjedde i byen. Folk hadde samla seg i klynger rundt barar og uteplassar, væpna politi og pansra bilar var overalt. Politiet stengde gater og ingen trikkar var å sjå. Vi kom oss inn på museet og gjekk ein liten runde og kika på maleri vi visste Van Gogh og Picasso hadde måla. Ikkje var vi interesserte i meir og ikkje orka vi å gå meir heller. Men vi kan i allefall seie at vi har vore der.
Vi oppdaga fleire som var meir opptatt av det som skjedde utanfor museet enn det som var inne, og først då oppdaga vi kvifor det var slik oppstandelse i gatene før vi gjekk inne. Ajax hadde vunne landfinalen i fotball.
Pansra bilar, politi og utømmelege mengder med glade nederlenderar
Det var ikkje berre vi som var ute med kamera denne dagen, var ikkje dette eit kult motiv så veit ikkje eg!
Vi fann oss ein Starbucks og fekk kjøpt oss kaffi
Avsindige mengder menneke som drikk avsindige mengder alkohol slepp frå seg avsindige mengder søppel – det skal vere sikkert og visst. Verre grisesti har eg aldri sett før, det var søppel overalt!! Alle slapp søpla rett ned og ingen såg ut til å bry seg om å kaste det i søppelbøtte som stod rett attmed dei, heilt utruleg.
Etter å ha blitt lei av hoiing, skrik og skrål fann vi oss ein japansk restaurant som låg i ei stille og roleg gate. Vi åt, som vanleg, kjempegod mat, før vi rusla tilbake til hotellet og tok kvelden.
